Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Замест 40% збяднелых палякаў у вядоўцы СТВ атрымалася амаль 70%
На СТБ расказалі пра апытанне, як палякі ацэньваюць сваё фінансавае становішча.
Амаль у 40% апытаных палякаў фінансавае становішча ў параўнанні з 2024 годам пагоршылася, у 27% — пагоршылася значна, расказала вядоўца «Навінаў» на СТБ. Яна спаслалася на вынікі апытання, праведзенага ў Польшчы. Каманда Weekly Top Fake знайшла ў яе словах маніпуляцыю.
Пра пагаршэнне матэрыяльнага становішча палякаў вядоўца СТБ расказала ў навінавым выпуску 24 красавіка 2025:
«Больш траціны палякаў лічаць, што сталі значна бяднейшымі. Пра гэта сведчаць вынікі апытання, праведзенага Інстытутам рынкавых і сацыяльных даследаванняў. Яго адмыслоўцаў цікавіла, як жыхары краіны ацэньваюць свой матэрыяльны стан, як спраўляюцца з інфляцыяй і ўзростам цэн на прадукты харчавання. Вынікі не даюць нагоды для радасці. Амаль 40% апытаных сказалі, што іх фінансавае становішча пагоршылася ў параўнанні з мінулым годам, а 27% прызналіся, што яно стала нашмат горш. Больш паловы палякаў расказалі, што іх выдаткі нашмат выраслі».
З яе словаў вынікае, што на пагаршэнне жыццёвага ўзроўню скардзяцца больш за дзве траціны палякаў: 40% плюс 27%. Вядоўца спаслалася на апытанне Інстытуту рынкавых і сацыяльных даследаванняў. Яго вынікі сапраўды паказалі, што пагаршэнне дабрабыту адчулі на сабе каля 40% апытаных. Але гэтая колькасць улучае і тых, хто лічыць, што стаў значна бяднейшы. Апошніх сярод 40% — 12%, а не 27%, як сказала вядоўца.
У «Навінах» таксама не ўзгадалі, што больш за чвэрць апытаных заявілі, што іх дабрабыт вырас, а для штотрэцяга нічога не памянялася.
Каманда WTFзнайшла ў экспертаў незалежнага даследчага цэнтру BEROC адказы беларусаў на падобныя пытанні. Напачатку 2025 года амаль чвэрць апытаных заявіла пра скарачэнне сваіх прыбыткаў, 23% — пра падвышэнне, у большасці — нічога не змянілася.